Sie sind hier: Witanje / Begrüßung 

Witanje / Begrüßung 

 

Serbski muski chór Delany

DELANY – serbski, katolski kraj – hač do powójnskich lět burski, chěžkarski, w kotrymž sej ludźo do dźěła spěwachu. Hižo 1876 załoži so w Šunowje muske spěwarske towarstwo z mjenom „Róža“, kotrež bě z nastorkom za pozdźiše „Spěwarske towarstwo za Ralbičansku wosadu“. Spočatnje mějachu přistup jeničce mužojo „dobreho a čestneho mjena“, kotřiž su 18. žiwjenske lěto docpěli.

Na iniciatiwu literarneho wědomostnika a basnika dr. Jurja Młynka Šunowskeho wozrodźi horstka horliwych delanskich muži spěwarske tradicije a załoži 1971 musku spěwnu skupinu w Konjecach. Wodnjo wukonjachu swoje dźěło jako ratar, dźěłaćer, wučer abo přistajeny, wječor pak zwjedźeštej jich lóšt a lubosć k spěwej do zhromadneho zwučowanja. Jich prěni dirigent bu Alfons Hrjehor, młody wučer na wjesnej Ralbičanskej šuli. Wušiknje zamó muske hłosy kubłać a formować.

Hižo z prěnimi koncertami w domjacej wokolinje zdobychu sej mužojo přichilnosć ludnosće. Dale a bóle so do wutrobow ludnosće zaspěwachu. Woblubowany chór wuhotowa tradicionalne nazymske koncerty po wšej Łužicy a bu kruće zapřijaty do kulturnych programow na wokrjesnych a centralnych festiwalach serbskeje kultury. Jedyn z wjerškow bě sobuskutkowanje na předstajenju oratorija Handrija Zejlerja a Korle Awgusta Kocora „Serbski kwas“ na župnym festiwalu 1978 w Ralbicach.

Składnostnje swojeho 10lětneho wobstaća da sej chór mjeno „Serbski muski chór Delany“. Hižo 1974 poda so spěwny cyłk na prěnju wukrajnu turneju do susodneje Pólskeje. 1979 wobdźěli so chór na Mjeńšinowym festiwalu w městačku Sanct Gotthard w Madźarskej. Dožiwjenja pola w třikrajowym Madźarsko-Awstrisko-Južnosłowjanskim róžku sydlacych wobydlerjo narodneje mjeńšiny Słowjeńcow su nam njezapomnite. Pozdźišo, w lěće 1985, nawjazachmy styki k měšanemu chórej „Křižkovski“ do susodneje Słowakskeje. W kulturnym domje „Petra Bezruča“ w Opavje mějachmy runje tak njezapomnite zhromadne koncerty kaž w Šunowskej Fabrikskej hospodźe w našich łužiskich Delanach.

Njezapomnity je spěwarjam je tež wustup chóra 1991 w Narodnym muzeju w Praze.

Po nahłej smjerći našeho dirigenta Alfonsa Hrjehorja přewza 1990 wušikny a nazhonity wučer za hudźbu Pawoł Šołta – Kulowski wuměłstwowe nawodnistwo chóra.

Bórze po politiskim přewróće nawjazachmy přećelske styki k dujerskemu orchestrej w Saerbecku njedaloko Münstera. Tak mějachmy wurjadnu składnosć, našu serbsku spěwnu kulturu prěni króć tež w starych zwjazkowych krajach Němskeje reprezentować. Lěto pozdźišo hižo móžachmy partnerski Kolpingowy orchester pola nas w Delanach witać. Na zhromadnym koncerće w Šunowskej Fabrikskej hospodźe a při wobrubjenju swjedźenskeje božeje mšě w Róžeńčanskej putniskej swjatnicy Swjateje Marije na Lipje nas serbscy a němscy wobydlerjo ze zahoritosću dožiwichu.

Za swoje zasłužbne ludowuměłske skutkowanje bu Serbski muski chór Delany 1984 z Mytom Ćišinskeho a 1989 z Wuměłskim mytom Domowiny wuznamjenjeny.

W lěće 2005 so dirigent Pawoł Šołta – Kulowski ze słužby rozžohnowa a přepoda taktowy kij Wolfgangej Fristerej. Jeho běchu mužojo wuspěšnje za noweho wuměłstwoweho nawodu nawabili. Swoju 15lětnu słužbu jako hłowny dirigent Serbskeho muskeho chóra Delany zakónči Pawoł Šołta – Kulowski ze swojim mišterskim dźěłom. Delanscy mužojo předstajichu na koncerće k zazběhej swjedźenskeho lěta k 35lětnmu wobstaću spěwneho cyłka w nowembru 2005 w Šunowskej Fabrikskej hospodźe swoju prěnju CD. Na zarjadowanju so Pawoł Šołta – Kulowski oficialnje z chórom rozžohnowa, slubjo mužam wupomhać, hdyž je nuza wulka. Swój slub wón dźensa hišće swěru dodźeržuje. Wot lěta 2006 do 2009 dirigowaše chór Wolfgang Frister. Wot lěta 2009 do 2012 wukonješe to chórowy spěwar Serbskeho ludoweho ansambla Michał Janca. Jemu slědowaše Handrij Henčl, kotryž je kaž jeho předchadnik spěwar Serbskeho ludoweho ansambla. Lěta 2019 wopušći henčl na swójske přeće muski spěwny cyłk. Dołho je wjednistwo chóra na to za to nowym dirigentom pytało. Samo Pawoł Šołta–Kulowski je dirigentstwo hišće raz na poł lěta přewzał muži chětro wužadał. Mjeztym ma Serbski muski chór Delany wot lěta 2020 z Matejom Kowarjom młodeho a agilneho wuměłstwoweho nawodu. 30lětny wučer hudźby chórej tyje a zamóže cyłk do nowych runin wjesć. Serbski muski chór Delany ma tuchwilu 35 čłonow. Z nich je 26 aktiwnych spěwarjow w starobje 30do 80 lět z cyłkownje 14 wjeskow podłu Klóšterskeje wody.

 

Wutrobnje strowi předsydstwo Serbskeho muskeho chóra Delany.

 

 

weiter zu:

Zdźělenki


Pytamy stajnje nowych angažowanych spěwarjow do našeho muskeho chóra. Najnuznišo trjebamy muži w starobje 30 do 50 lět, kotrež přicpěwaja sej w spěwanje w druhim basu našeho spěwneho ćělesa. Přiwšěm pak su tež wšitcy dalši zajimcy, kotřiž chcedźa Serbski muski chór Delany ze swojim hłosom zesylnić lubje witani. Chór zwučuje prawidłownje na wutorach wot 19 hodź. w Konječanskej Burskej stwě, kotraž je w tamnišim towarstwowym domje „Delany“ při gratowni wohnjoweje wobory zaměstnjena.

So mnohich nowych spěwarjow nadźijejo přepropšamy tuž wšitkich zajimcow na naše přichodne zwučowanja:

předsydstwo muskeho chóra Delany

 

Mitteilungen


Wir suchen ständig neue und engagierte Sänger für unseren Chor. Am dringendsten brauchen wir Männer im Alter von 30 bis 50, die sich zutrauen bei uns im zweiten Bass (sehr tief) zu singen. Abgesehen davon sind auch alle anderen Interessenten, egal welchen Alters und welcher Stimme, die den sorbischen Männerchor Delany mit ihrer Stimme verstärken möchten, recht herzlich willkommen. Unser Chor probt regelmäßig an Dienstagen ab 19 Uhr in der Cunnewitzer Bauernstube im dortigen Vereinshaus „Delany“, das sich gleich neben dem Feuerwehrgerätehaus befindet.

Auf regen Zuspruch und viele neue Sänger hoffend ladet alle Interessenten zur nächten Übungsstunde ein:

der Vorstand des Sorbischen Männerchores Delany    

Powered by CMSimple_XH | Template by CMSimple_XH | (X)html | css | Login